取回九蚊公道
昨午在東大街吃魚蛋清湯腩河加底。天氣太熱，叫咗支玉泉忌廉。喂呀，打開個樽蓋插飲管，個樽口生晒銹嘅。同阿姐講：「嘩！支汽水你擺咗幾耐㗎？」佢又用嗰啲，即係你試完件衫想要件新，boutique Sales一定話你知呢件就係新嘅，放咗出嚟唔夠半個鐘的口脗話：「支汽水新返嘅，樽口有些少銹，飲落冇事嘅!」然後佢又好殷勤咁扯咗張廁紙，幫忙抹咗個樽口幾下，又好似抹甩了少少。咁好啦，只怪自己對熟齡師奶沒有抵抗力，咁就飲咗大半支。
返到公司，唔夠一小時，個肚開始劇痛。又四圍找不到平胃散之類的藥，咁唯有深呼吸啦，請師公上身啦，盡力想其他事情分散注意力啦，仍然痛到伏在枱上，最終吃了包小柴胡湯，腸好了些，仍避免不了肚屙。然後開會，晚上再屙一次，心𥚃有點怨自己竟然沒拿定宗旨，#%**Xy@$¥。
早上起來，本來沒那麼肚痛，吃了早餐仍絞了一陣，再屙一次。返公司經過東大街魚蛋粉店，走進去跟老闆娘說理，告訴她們忌廉壞了不要賣，害我前後屙了三次。老闆娘出名黑面，但聽到合理的陳述也沒發蠻，解釋汽水運來可能有段時間沒冷藏好，樽蓋濕了水積了銹漬。她不好意思，建議我看醫生賠我湯藥費。我說自己不看醫生，但那支忌廉你沒可能收錢，要賠番汽水錢。
於是她給了我九蚊，總算她作為話事人，做錯了事肯認數，公道取回，條氣順番些。臨行時斜眼看了昨天氹我飲生銹忌廉的阿姐，也沒怨恨，只是告訴自己要小心，今後對熟齡阿姐也要提高少少警覺。
Search